Cerita Rahatan 17 (Pijet-Pijetan)

Sore -sore bojoku balik sing kantor teles klebes kudanan,padahal lagi arep mangkat nyong wis ngelingna kongkon nggawa payung,jawabane malah " panas kaya kiye ora bakal udan,ngko ari udan ya sampeyan nusul rah mas "...iya wis ngko tak susuli.

ari bojoku mangkat kerja nyong ya uplekan ning umah bae momong bocah,yen dina sabtu minggu lah nyong tembe nglendang separan-paran ora ngandang,kadang ya ari bojoku repot ora bisa maring kantor,nyong njuguli mangkat ning kantor,lah yong kantore bebas nemen,sering-seringe bojoku dewekan ning kantor,sing liyane pada patroli,nyong ya tau melu patroli nangkep penyelundup kidang,barang kecekel jebulane kidange pesenane Kapolrese,iloken pan ngasusna Kapolrese,lah yong umah kontrakanku mburi umahe Kapolrese,nengsih umahku bisa-bisa gendenge pada ilang,anjoge mung dikongkon ngurus surat penangkaran,ditangkarna apa disembeleh nyong belih ngarti,tugase nyong kur ndokumentasikna tok alias jeprat jepret nggo kamera.

Balik maning sore-sore,

dog dog dog brraaakkk...mas,mas bukakna lawang,tangi rah aja turu bae...nyong kaget njimprak tak kira ana demo...iya-iya ngko sedelat tak nggoleti kunci...krertekkk kretekkk krekeeettt lawang tak buka..."rika sih priben mas jare pan nusul tak enteni nganti sore malah ora teka-teka,ya kyeh anjoge nyong kluncur kabeh".."lah yong bochae turu anjoge nyong ya keturon"..."ngemprah boled lah rika tah mas"...bojoku mlebu maring kolam adus gebyar gebyur nggo banyu atis,barang wis rampungan adus,deweke madang rupane ngelih nemen,bar madang wareg terus turu...ding nyong tak jorna bae,alamate sore kiye sing ngadusi bocah ya inyong.

jam 11 bengi aku esih nonton TV,bojoku awit sore ora tangi,barang jam 12an bojoku nglilir...sssshhh hehhhhh hhhheeeeehhhhh....mas,mas mene gen...."ana apa honey"( nyong semaur )..."honey,honey wadukmu kiye nnyong awake ndrogdog nemen pada linu kabeh,mbara dipijeti ya kena rah...nyong nyekel batuke bojoku,ternyata bener panas nemen..." demam kyeh kon tak keroki bar kuwe tak pijeti ya"...." Sakarepmu mas sing penting nyong waras"...

bojoku tak keroki nganti pada njledor abang ireng,bar kuwe tak pijeti,nyong mijeti karo sambi ngejak ngobrol..." gyeh honey nyong pan ndopok"..."ndopok gari ndopok koh dadakan poyan,tolih ora usah honey,honeyan kaya sinetron bae,wis gagiyan kjon pan ndopok apa?"..."kaya kiye honey,jarene kanjeng Nabi Muhammad,wong sing kenang demam kuwe,wong sing kena hawa panase neraka atawa uape neraka"...." lah terus maksude priben mas apa hubungane karo nyong "..."lah kuwe,angger kon tah ora kenang hawane neraka tok,tapi wis kecemplung ning neraka"..." hhhhooooo wong gemblung bisane nyong wis kecemplung neraka apa dasare rika ngomong kaya kuwe"..." lah kiye buktine bekas gebugane malalikat malik ana ning gigirmu pada abang ireng,balunge kon gen pada linu mbok...wkwkwkkwkwkwkwkwkwkkw...

"wis wis mandeg lah mijetine rika tah bojone mriyang jare malah moyoki"..."lah nengsih ari ora dipijeti ngko kon ora mari-mari"..." wis mbuh lah mandeg pokoke...suka lara awak ketimbang lara ati...wis mana rika metu sing kamar,pokoke seminggu kiye prei ora pan sunah rosulan!!!.....wkwkwkwkkwkw nyong metu karo ngikik bae,rupane bojoku sewot nemen.

Nganti seminggu nyong turu ning ngarep TV kur nggelar klasa,anjoge nyong ya mriyang tapi pan njaluk kerokan ora wani mbokan gantiyan dipoyoki he heh ehe

Ya wis semene ndisit sedulur muga-muga terhibur

Sumenep - 12 - 12 - 2011

Cangkem ( dicanCANG karo dibungKEM )

Bismillahirahmanirrahim

Sayidina Ali ngomong “Kumasukan lisanku kemulutku, hingga terbukalah dihatiku seribu pintu ilmu, yang pada setiap pintu terdapat seribu pintu yang lain”.

Kiye rahasia keilmuane Sayidina Ali,sing pertama kudu di gembleng kuwe “cangkem”,urip ngerEm cangkem ben aja brecuh omongane,sekirane ora penting atawa ora manfaat mending ora usah ngomong ( meneng )ilate ditelesi nggo asmaul husna ( ngundang-ngundang gusti Allah ).jare peribahasa “mulutmu harimaumu”,angger salah ngucap ya kepangan ding omongane dewek,ana maning peribahasa “lidah lebih tajam dari pada pedang”,ucapan kuwe bisa ndadekna lara maring wong liya.

Nggo gambaran ibadah puasa, sing ditata ndisit kan “cangkem” ora olih madang ora olih nginum,ora olih ngomong sing saru-saru,angger cangkeme wis nata,otomatis indera-indera liyane ya melu nata,ari indera-indera wis nata kabeh ora nglakoni sing ora petha,otomatis atine ngko mbuka,ati kuwe gudang ilmune gusti allah,kelingan kisah waktu gusti Allah tembe nyiptakna nabi Adam,malaikat kayong madan ngragukna Nabi Adam dadi khalifah fil Ardi ( khalifah ning bumi),akhire gusti Allah nguji ning malaikat..”gyeh malaikat angger kon rumangsa wis pinter,mbarah kon ngerti belih aran-arane benda kiye”gusti Allah nidok-nidokna macem-macem benda ning malaikat,malaikate bingung ora bisa njawab,anjoge gusti Allah ngongkon ning Kanjeng Nabi Adam nyebutna aran-aran benda sing ana ning ngarepane ( tapi sedurunge, gusti Allah mbuka atine Nabi Adam terus ndokoni ilmu ning atine nabi adam )nabi adam janji ceplos bae ngucap aran-arane benda sing ana ning ngarepane,”kiye watu,kiye geni,kiye,banyu,kiye angin,kiye cungur,kiye mata,kiye,rambut,pirang-pirang sing disebutna ding nabi Adam,kata-kata kuwe kabeh wis ana ning njero atine nabi Adam.

Lah terus nyong rika kabeh sing dadi anak putune nabi adam ya pada bae kaya kuwe rah nean,ilmune wis ana ning njero ati,anane sinau sekolah kuwe nggo mancing-mancing ilmu sing ning njero ati ben pada metu,wiridan,maca Alquran,puasa karo ibadah liyane ya fungsine nggo mbuka ati ben ilmune pada mrojol,nggo gambaran bayi bisa weruh apa bisa krungu,apa bisa nangis,kuwe sekolah ndisit apa ora?mbokan ujug-ujug bisa rah.mulane bae kanjeng nabi Muhammad ora bisa maca karo nulis,ora mondok ning pesantren, tapi mbangkana cerdase sebabe atine bersih,langka kekotoran sing ngalang-alangi mrojole ilmune.saking melase gusti Allah maring nyong karo rika kabeh,akhire ngongkon puasa,sembahyang,wiridan ben ilmune pada mrojol sing ati.nggo gambaran ( analogi )maning,kelingan lagi cilik disuntik ( imunisasi ) fungsine nggo mbangkitna daya tahane awak ( imun ) waktu diserang penyakit,dadi bahan obat penyakit kuwe kabeh wis ana ning awak,mung ya durung aktif,ari pengin aktif ya kudune dileboni bibit penyakit sing wis dilemahna,anjoge antibodine bangkit.nggo analogi maning sifat adem kuwe manggone ning angin apa ning es apa ning awake menungsa?...Es ari adoh sing awak ya ora metu sifat ademe,tapi barang di perekna ning awak apa dikletak nggo untu,awak langsung ngetokna rasa ademe,dadi muncule hawa adem kuwe sing awak dudu sing Es,es tah nggo mancing metune hawa adem sing ana ning awak.Dadi aja pangling aja kaget ning alam dunia,kuwe kabeh gambaran sing wis ana ning njero ati.

Ya wis semene ndisit sedulur,yuh pada di”ruwat”cangkemme,dikunci sing rapet ben kebuka mata bathine,kebuka perbendaharaan ilmune.

“ari pengin mbuka ya kudu nutup ndisit”

Muga-muga ana manfaate nggo nyong karo rika kabeh,yen ana kata-kata sing ora pas,nyong njaluk ngampura sing akeh.

Ya Allah,nyong njaluk diadohna sing sifat rumangsa pinter dewek,sebab kuwe nutupi kecerdasan akale nyong,Ya Allah nyong njaluik diadohna sing sifat rumangsa bener ( suci ) dewek,sebab kuwe nutupi ketajeman Bathine nyong…..Amin…amin ya robal alamin.

Sumenep - 28 - 11 - 2011

· ·

Kyai dudu Ulama

Bismillahirrahmanirrahim

Akeh-akehe masyarakat pada salah ngerti dikirane Kyai pada karo Ulama,padahal ari dikaji sing asal usul basane “Kiyai” kuwe sebutan penghormatan masyarakat jawa kuno maring ( uwong,gaman,khewan,Jin ) sedurunge agama Islam mlebu ning tanah jawa.Dadi sebutan “kiyai”dudu mung nggo uwong tok,kebo bule ning keraton solo arane Kiyai Slamet,gaman kerise Haryo penangsang arane Kiyai Setan Kober karo kiyai bethok jarane arane Kiyai Gagak rimang,Keris gaweane Empu Supa Anom arane Kiyai Sengkelat.Seumpama nyong karo sampeyan duwe barang sing sekirane ana jasa karo manfaate ning dewek pan di arani Kiyai ya kena,misal motore nyong merga bisa nggo ngebut banter terus diarani “ Kyai Mlayu Nonet” ya ora papa,ora dosa, lah yong raja Jin ning wilayah kabupaten Brebes gen arane Kiyai Dhadung Awuk,angger ana uwong sing bangga disebut Kiyai,kudune ngaca,kayong seneng temen gelem dipadakna karo khewan,gaman,Jin.

Lah angger Ulama sih apa…?

Ulama Warosatul Anbiya ( Ulama pewaris Nabi ) mewarisi apane?...Ilmu karo kelakuane,dadi yen uwong tembe ngerti ilmune tok apa wis bisa diarani Ulama?apal Alquran,hadits terus bisa ndongeng wis bisa diarani Ulama..?kayong penak temen ari mung bisa ndongeng tok diarani pewarise Nabi.Angger ndeleng perjuangane kanjeng Nabi Muhammad nyiarna Islam rekasane poret,harta bendane deweke karo hartane bojone entek nggo dakwah,duwe murid akeh ora pernah njaluk SPP ( bayaran )apa maning uang gedung,kanjeng Nabi nguripi agamane dudu urip sing agamane,dakwah dadi mlarate ora dadi sugihe,ikhlas ora ngresula.Kanjeng Nabi olih ilmu sing Gusti Allah gratis ora mbayar SPP ora mbayar uang gedung,lah koh jaman saiki pan sinau ilmune gusti Allah ana mbayar SPP ana mbayar uang gedung ana mbayar seragam durung ngko ana wisata religi anapan,jan reka-reka bae jaman saiki tah.

Sing lucu maning,wong sinau ilmu agama barang wis apal Alquran ,hadits terus melu audisi ning tivi pengin dadi Da’i,berusaha tampil seapik mungkin ning ngarepe juri karo sing nonton,ora jere berusaha tampil seapik mungkin ning ngadepane gusti Allah.kiye wong ora sadar dadi korban komersialisasi agama,ding produsere, acara kiye didol ning perusahaan-perusahan sing gelem pada ngiklan,kiye sing arane tuntunan dadi tontonan.

Lah terus sing pantes diarani Ulama kuwe sapa…?

Sing pantes ya wong-wong sing ngerti ilmu agama terus dilakoni ning keseharian,sapa bae mbuh nyong,mbuh rika ari ngerti ilmu agama setitik apa akeh,terus gelem nglakoni ya kuwe bisa diarani ulama ( pewaris ilmu karo laku lampahe kanjeng Nabi ).

Alim kuwe tembe ngerti tok ning agama tapi ari Ulama kuwe ya ngerti ya nglakoni,ilmune wis matek ( mewatak ) wis reflek ( spontan ),nglakoni perbuatan apik sing tanpa dipikir ndisit,ora mikiri pahala atawa surga,apa maning untung rugi,weruhe prentahe gusti Allah,dadi gerak awake kuwe wis nyerminna jerone Ilmune.ilmune katon ning tindak tanduke dudu ning omongane.

Ya wis semene ndisit sedulur muga-muga ana manfaate nggo nyong karo nggo rika kabeh,yuh pada dadi Ulama ( pewarise kanjeng nabi )ning adepanE gusti Allah,aja dadi Ulama ning adepane menungsa.angger sekirane ana kata-katane nyong sing ora pas,nyong njaluk ngampura.

Ya Allah nyong njaluk diadohna sing sifat rumangsa pinter dewek,sebab kuwe nutupi kecerdasan akale nyong,Ya Allah nyong njaluk diadohna sing sifat rumangsa paling bener ( suci ) dewek,sebab kuwe nutupi ketajeman mata bathine nyong….Amin,amin Ya Robal Alamin.

Filosofi CIPOKAN ( moCI,ndoPOK,mendoAN )

Bismillahirahmanirrahim

“ Tuntutlah ilmu sampai ke negeri Cina”,

jare sabdane kanjeng nabi Muhammad SAW,ana sebagian wong ngomong kwe tah mung ibarat tok ( bagjane adoh ya dilakoni nggolet ilmu )sebabe negeri Cina kwe adoh sing arab,berarti ari kaya kuwe hadits kiye ora relevan nggo wong-wong sing urip ning perekE negeri Cina,nyong yakin kanjeng Nabi Muhammad pati-pati ngongkon menungsa nggolet ilmu nganti anjog negeri Cina,kuwe ora janji ceplos tapi berdasar fakta bahwa negeri Cina gudange ilmu,contone bae obat-obatan tradisional cina,tekek,coro,ula gen bisa dadi obat,terus ning Cina kuwe serba apa-apa ana filosofine,ana nilai Etika,Estetika karo Metafisika.

Etika kuwe perihal Moral karo tata krama,Estetika kuwe perihal Keindahan,Metafisika perihal sing ghaib.

Nganggo Contoh mEdang Teh Poci,budaya kiye ari ning Cina jaman kuno,kuwe nggo nyambut tamu-tamu agung atawa wong-wong sing dihormati,kadang acara medang Poci nggo diplomasi jenderal-jenderal arep nentukna sida perang apa ora karo musuhe.

Nyong ora pan mbahas luwih adoh perihal filosofi Cina,tapi yuh pada belajar ndokoni filosofi ning budaya atawa hal-hal sing sering dilakoni ding dewek,niru-niru kaya wong Cina.

Budaya nginum Teh Poci ora mung ning Cina tok,ning kota-kota kulon gunung slamet tercinta gen ana Budaya CIPOKAN ( moCI, ndoPOK,mendoAN ),ari ndopok angger ora karo nyambi nyruput Teh Poci karo nggemos mendoan kayane gerah rungsang belih karuan.

Pertama ndokoni makna ning banyu,banyu kuwe sering digambarna Ilmu,wong nggolet ilmu geguru maring endi ora, nganti olih pirang-pirang Ilmu,barang wis rampung gegurune apa wis bisa diarani mateng ilmune?...ora bakal mateng ilmune angger durung di obong nganggo geni,ora bakal mateng ilmune angger durung di uji permasalahan-permasalahan sing pelik-pelik,sebabe kuwe nesih teori,nembe maca karo ngapalna tok durung praktek langsung,sing dipelajari ning sekolah apa pesantren kuwe mung garis besare tok atawa pokok-pokoke,angger kepengin weruh sekabehane ya ning kehidupan nyata.Kesabaran ari ora tau ngalami ujian arane goroh,kejujuran ari ora tau ngalami ujian ya goroh,istiqomah ari ora tau ngalami ujian ya goroh,dadi perjalanan nyatakna ilmu kuwe angger jare Sayidina Ali ibarat “nglewati ewonan sabetan pedang” sepira hebate menungsa ngindari pasti pernah kegores pedang,maksude tah sepira wong berusaha ngindari salah pasti tetep pernah kejeblos ning salah,tapi sinau sing kesalahan sing tembe dilakoni akhire ndadekna kesadaran bahwa menungsa kuwe ( makhluk )ora sempurna,sing Sempurna mung gusti Allah tok,lah kiye sing dimaksud “diobong”.sinau sing kesalahan karo nyadari kemakhlukane kye ndadekna mateng ilmune ( umeb banyune ).

Teh kuwe rasane sepet,wangi…rejekine sepet,rejekine wangi,prestasine sepet,prestasine wangi,arane sepet,arane wangi,kiye gambaran ujian sing dialami menungsa,susah ya ujian bungah ya ujian,akeh wong pada ngira ujian kuwe “kesusahan”,dinein rejekine sepet,nesih pan gandulan belih karo gusti Allah,dinein rejekine wangi ( omber ) nesih pan syukuran apa justru pan pesta ora karuan.

Banyune wis umeb teh wis dibuka wadahe, terus dilebokna ning Poci diaduk,maknane ilmu karo kabeh ujian sing dialami dipasrahna kabeh ning Gusti Allah,Poci gambaran gudange Gusti Allah,gari nyiapna gelase,gelase kudu sing bersih angger gelase ora bersih ya banyu Teh-E ora dikucurna,kucuran banyu sing poci maring gelas kuwe gambaran taufik ,hidayah,inayah,berkah,nikmat wis pirang-pirang maknane,gelas gambaran awake menungsa,gelase diisi gula turut secuil aja kakehen gula angger kakehen ya manise leder malah wetenge dadi enek,sing arane nikmat kuwe bisane nikmat karena secuil,angger wis ( mlukEk ) kakehen ya ora nikmat maning,antarane teh karo gula kudu harmonis ( seimbang ).seumpamane nyong rika nggal dina mangan daging esuk,awan sore ,bengi ,suwe –suwe kenikmatane daging ilang.angger kepengin ngrasakna nikmate daging ya aja keseringen mangan daging,ari kepengin ngrasakna nikmate numpak motor ya aja keseringen numpak motor.jare Sayidina Ali “Kalau ingin cepat putus,berkunjunglah terus menerus,kalau ingin terus menerus berkunjunglah terputus-putus”maksude tah dadi wong aja serakah,kudu bisa nyiasati, olih nikmat akeh sing gusti Allah tapi ora dadi wong serakah.

Barang wis ketemu kabeh banyu teh karo gula ning gelas,wis rah gari disruput alon-alon….Srruuuupppppuuuutttt…hheeeeemmmm…alhamdulilah nikmat,aja klalen mendoan karo kecape Joooo…!!!... ( medange nggone lilike inyong (Paijo ) ning pinggir jembatan kali keruh ),ari wedang teh sing ning gelas wis kosong nengsih sing nyekeli pocine gagiyan ngiseni,dadi ari pengin dijogi terus wedange ding Gusti Allah ya kudune rumangsa kosong,rumangsa ora nduwe ilmu,ora nduwe kesugihan,ora nduwe jabatan,ora nduwe kesaktian,sebab kuwe kabeh angger gusti Allah ora ngejogi ya gelase kosong ora bakal ana isine,tolih angger isi sing ning gelas kayong luber ya gagiyan dijogna maring gelase wong liya,ben banyune ora mubah malah dadi berkah,angger jare bahasane kyai,ya dizakati lah banyu wedange.

MendoAn, kuwe gambaran ilat,duwe ilat kudu sing lemes aja kaku,aja sokan nggo mitnah apa ngece uwong liya,ari krungu apa-apa dikunyah sing lembut dirasa-rasa ndisit esih panas apa wis adem,mendoan esih panas dijejelna bae ning cangkem ya anjoge kemlopok ilate pada mlesdak ledes,pedes manis irenge kecap dimamah sing bener,sambel kecap luwih akeh kecape apa cengise?..nengsih akeh kecape,wong liya krungu manis asin gurihe bae,sing pedes tah nggo dewek bae,ari kepedesen ya mulane gagiyan di sruput wedange.

Angger wis glenggam glenggem nginum teh sing panas ,sepet,manis,kentel ya gari ndoPoke,angger wong wis tau ngrasani sepet manise teh, cerita maring wong liya bahwa medang teh poci kuwe nikmat,ya ceritane ora pElo,mbok jleb dirungu mlebu ning ati,sebabe wis tau ngalami,tapi angger jare-jare tok ya hambar ceritane. Sepira manise Gula ari mung dicampur banyu bening tok ya ora enak,dadi kudu ngrasakna dicampur teh atawa kopi,kenikmatan kuwe muncule diantara perpaduan panas ,pait,sepet,manis.

Urip ning dunia kuwe ,milah-milah nggoleti kenikmatan karo keslametan,ning perpaduan kesusahan karo kebungahan.ning susah ya ana nikmate,ning bungah ya ana nikmate, aja ketindihan susah aja ketindihan bungah.

Ya wis semene bae ndisit sedulur,muga-muga ana manfaate nggo nyong karo sampeyan kabeh,mbokan ana kata-kata sing ora pas,nyong njaluk ngampurane.

Ya Allah… nyong njaluk diadohna sing sifat rumangsa pinter dewek,sebab kuwe nutupi kecerdasan akale nyong,…Ya Allah… nyong njaluk diadohna sing sifat rumangsa bener ( suci ) dewek,sebab kuwe nutupi ketajaman mata bathine nyong…amin,amin ya robal alamin.

Sumenep - 25 - 11 - 2011

Makna Ci Luk Ba

Bismillahirahmanirrahim

( 1).Ana haditse kanjeng Nabi Muhammad perihal Bismillah,Sabdane kaya kiye…” Kabeh isine kitab-kitabe Gusti Allah sing di udunna ning dunia kabeh ana ning njerone Alquran,kabeh isine Alquran ana ning surat alfatihah,kabeh isine surat Alfatihah ana ning njerone Bismillahirahmanirrahim.

( 2 ).Ana maning hadits liyane sing nyebutna “ Kabeh isine Bismillahirrahmaninrahim ana ning Huruf (Ba),kabeh sing ning njerone huru f ( Ba), ana ning ( titik ) sing ning ngisore huruf ( Ba ).

Nyoba dimaknani sing gampang bae hadits sing pertama, Bismillahirahmanirahim kan artine ( Kelawan nyebut asmane Gusti Allah sing Maha Pengasih lan Penyayang ),angger ndeleng hadits sing pertama jare isine Alquran 30 Juz ana ning Bismillah,berarti intine ALquran kwe ngongkon ning menungsa weruh Asma Rohman Rahim ,asma Kasih Sayang,ora mung weruh karo maca Bismillah tok,kudune ya asma Kasih Sayang kwe diterapna ning awak,akal karo atine,angger jare basane wong kuna,Alquran dimenungsakna,yen wis bisa dadi menungsa sing kasih sayang ya insya Allah bakal bisa ngerteni rahasia-rahasia ilmune gusti Allah.

Kelingan omongane wongtuaku mbiyen waktu nyong esih cilik “ ari pan apa-apa maca Bismillah ndisit “,jebul maksude tah ari pan apa-apa ,pan kerja,pan sekolah,pan dolan,pan dadi caleg,pan dadi pemimpin,pan dadi tentara,pan dadi ustadz kwe kudu dilandasi Bismillah atawa dilandasi kasih Sayang aja dilandasi karo hawa nafsu”,angger jare wong-wong ahli ma’rifat Bismillahirahmanirrahim kwe kedudukane pada karo KUN-e Gusti Allah,Gusti Allah ari pan ngerjakna apa-apa cukup ngomong KUN terus dadi kabeh,lah angger menungsa ari pan ngerjakna apa-apa macane Bismillah,intine njaluk ijin ning Gusti Allah ben apa sing lagi dikerjakna kwe dadi kabeh.

Makna hadits sing keloro,

Isine Bismillahirahmanirahim ana ning Huruf Ba,apa sih makna Ba?...padahal rahasiane sepele nemen ning dolanan Ci Luk Ba,yen di gali maknane Ci = Cai “bahasa Sunda artine Banyu”,banyu kwe gambaran ilmu. Makna Luk = lika liku atawa salah karo bener,Ba = keweruhan atawa konangan,ari lagi ndolani bayi begitu ci luk terus Ba tangan sing nutupi raine dewek kan dibuka,weruh raine bayi,bayi gambaran fitrah atawa kesucian,sebalike si bayi gen weruh wong sing ngejak Ci Luk Ba,makna sekabehane kaya kiye “ari menungsa wis weruh Salah karo benere deweke terus gelem diilmuni atawa didadekna hikmah,menungsa kuwe bakal weruh ning fitrahe deweke,ari wis weruh fitrahe deweke ngko bakal weruh ning awake dewek”…jare hadits qudsi “ Sapa wonge weruh ning awake dewek bakal weruh ning Tuhanne “,maksude tah ya ari wong wis bisa weruh ning rahasiane awake dewek,ngko Gusti Allah bakal mbuka rahasia Ilmune .

Saiki gari ( Titik ) sing ning ngisore huruf Ba,(Titik ) kwe makna fokus atawa Inti,maksude tah ari apa-apa sing fokus diweruhi ndisit intine,kabeh permasalahan ning dunia kwe ana intine,yen wis ketemu Titike atawa fokuse atawa Intine ya ngko cepet beres masalahe,lah kudune fokuse maring endi?...fokuse ya kudune ning Gusti Allah,masalah sing diadepi ding menungsa kwe kabeh hakekate sing Gusti Allah.

Samene ndisit sedulur muga-muga ana manfaate nggo nyong karo nggo panjenengan kabeh,yen ana kata-kata sing ora pas ning atine njenengan kabeh nyong njaluk ngampura,mergane sekolane dudu ning pesantren tapi ning terminal karo ning dalanan gen durung lulus lulus,Sing bijak sing cerah akal karo atine ben padang uripe…..maturnuwun wassalam.

Sumenep - 18 -11 - 2011

Endog karo Ayam

sing arane rahasia hal-hal sing rumit kwe biasane malah umpetan ning hal-hal sing sepele,sing biasa awake dewek weruh nggal dina,kabeh sing diciptakna ding gusti Allah ning alam dunia kwe pertanyaan atawa hisab nggo menungsa,sing arane pertanyaan ya kudune ana jawaban,kudune tah ya kabeh dijawab ning dunia ben mbesuk ning akherat langka pertanyaan maning.

ana pertanyaan klasik sing biasa ditakokna ding wong-wong filsafat " disit endi endog karo ayam "...kye tah pertanyaan gampang jawabane " disit sing gawe endog karo ayam ( gusti Allah )"...sebenere pertanyaan kiye dudu mung anjog semono tok pengertiane,angger gelem ngaji luwih jero maning,endog karo ayam kuwe bisa dimaknai sing luar biasa,sing arane endog kuning-kuninge kwe gambaran ruh menungsa,putih-putihe karo kulite kwe gambaran Dzat Allah,endog kwe gambaran alam akherat,kuning-kuninge dilindungi karo dinein mangan ding putih-putihe,barang wis mecah dadi pitik,pitik kwe gambaran menungsa lahir ning alam dunia,maune ruhe menungsa dadi siji ning ruhe Gusti Allah " Kusebulkan sebagian ruhKu padamu" angger dicermati kata "sebagian" berarti sedurunge disebulna ruh kwe bagian sing ruhe Gusti Allah,kaya kuninge endog karo putihe dadi siji.

akeh-akehe barang wis dadi pitik terus dadi ayam menungsa kwe kelalen maring asale,mikine sing ruhe gusti Allah ya kudune balike maring ruhe gusti Allah maning,kudune tah sedurunge mati wis dadi pitik ning njerone endog,urip tapi wis mati,mati kekarepan sing ora selaras karo karepe Gusti Allah,maksude tah dadi pitik tapi nganggo alame endog,kan kepenak serba dijamin karo dilindungi ding putih-putihe.

balik maning maring kalimat"kabeh sing diciptakna ding gusti Allah ning alam dunia kwe pertanyaan atawa hisab nggo menungsa"...ari kelingan ayat sing pertama mudun ning kanjeng nabi Muhammad kan "Iqra" ( bacalah ),lah kanjeng nabi pan maca apa? gena deweke ora bisa maca karo nulis,maca quran ya durung ana Quran sing tau mudun sedurunge ayat Iqra,pengertian Iqra ya dudu mung maca tok sing arane ngaji kwe dudu mung maca quran tok terus jare olih pahala,ngaji kwe ya kudune maca,ngartikna,maknani,nglakoni terus terakhir ngiklasna.terus ari dipikir maning iloken sih gusti allah ngomong kur lewat alquran tok,saiki wis liren ora ngomong maning,mbokan isine Alquran kwe kejadian karo kisah-kisah para nabi.lah kejadian sing nyong karo sampeyan ngalami nggal dina apa dudu pertanyaan atawa omongan sing gusti allah?...misal bae lagi mlaku weruh paku ning tengah dalan,kwe pertanyaan sing Gusti Allah " Pan di apakna kweh paku ding kon menungsa,pan disingkirna apa pan dijorna bae ben ana wong kesusuben paku?",angger nyong sadar ya nengsih langsung njawab " nggih gusti paku niki kulo singkiraken ben mboten ndadosaken bahaya teng tiyang sanes"..ya ari dipikir tah nggal detik gusti Allah ngejak ngobrol terus karo dewek...angger wetenge moni kemruyuk kwe gusti allah kur ora ngomong secara langsung " heh menungsa gagiyan mangan ".

dadi intine kabeh sing di respon ding indera-inderane dewek kwe pertanyaan sing Gusti Allah,kabeh sing dirasa ding indera-indera kwe mesti ana sisi positif karo negatife,lah gusti Allah ngongkon ning menungsa dijikot sing positife angger ngalami kejadian apa-apa,angger wis bisa kaya kwe ya arane selaras karo karepe Gusti Allah jare bahasa jawane " manunggaling kawula Gusti ",manunggal karepe dewek karo karepe Gustine,ben urip kwe selalu ning dalane gustine,ora ngawur,sing arane madep ning Gustine ya ora mung lagi sembahyang apa wirid tok, bar kwe madepe mbuh maring endi,maring duit apa maring wadonan apa maring jabatan.

lah ya wis samene ndisit bae semoga ana manfaate,jare imam Ghazali ilmu kwe terbagi 3

Ta,limi

Ilhami

Laduni

Ta,limi ( maca,ngringokna,sekolah )

Ilhami ( perlambang atawa Sasmita misal sing ngimpi,weruh kejadian )

Laduni ( kwe ilmu sing gusti Allah langsung sing nein,sing ujug-ujug bisa ) contone ari wong wedi keliwat tembok duwur 3 meter gen koh ujug ujug bisa di plempati.

wis ya sedulur semoga ana manfaate,sing bijak sing cerah akal karo atine ben padang uripe.

mbokmenawa ana kata-kata sing ora pas ya nyong njaluk ngampurane mergane nyong tah lulusan terminal karo dalanan dudu lulusan pesantren dadine bahasane ya sablegejedE.

Sumenep - 16 - 11 - 2011

Artis

ramai ramai ingin jadi artis

ramai ramai ingin jadi tokoh agama

hingga ku bingung

mana artis mana tokoh agama

topengnya sama

menjual diri untuk ketenarannya

bayarannya mungkin juga sama

munafiknya mungkin juga sama

pesta poranya mungkin juga sama

ini dunia hiburan

dunia yang seharusnya monopoli para pelacur

mereka yang menghibur dengan ayat-ayat Tuhan

menjarah pekerjaan pelacur

dan pelacurnya mau berbuat apa

ikut audisi untuk jadi artis

lalu akting jadi orang beriman

( terinspirasi setatus Djenar Maesa Ayu )

Sumenep - 16 - 11 - 2011

Kesadaran

Dimanakah letak panas

di api yang membara

atau didalam jiwa

dimanakah letak sejuk

di air yang membeku

atau didalam kalbu

saat terbius dimeja operasi

kemanakah rasa sakit pergi

walau berdarah tak terasa

dan

ketika tersadar segala rasa

terasa

"Kesadaran"

inikah jawabnya,

mereka yang selalu sadar

merekalah yang dapat rasakan semua

Pahit,Getir,Manis,Asam

Dingin,Panas,Semilir

Sedih dan Bahagia

Sumenep - 14 - 11 - 2011

Bada Aji ( Korbanan )

ngormati sejarah kanjeng nabi Ibrahim,sing arep ngorbana anake nggo gusti Allah,padahal wahyu kuwe tekane mung lewat ngimpi,tapi jan luar biasa nemen keyakinane kanjeng nabi ibrahim mung sekedar ngimpi tok gen ngandel nemen yen kuwe prentah sing gusti Allah,prentah pembuktian cintane kanjeng nabi Ibrahim maring gusti Allah,luwih cinta maring gusti Allah apa maring anake,tanpa was-was kanjeng nabi ibrahim manut bae arep nyembelEh anake,saking melase gusti Allah,akhire diganti nganggo wedus gibas.

hikmah sing bisa dipetik sing kejadian kiye,apa bae sing disenengi ning dunia aja nganti ndadekna klalen karo gusti Allah,Nabi Ibrahim ngorbana anake nggo pembuktian cintane ning Gusti Allah,...lah nyong,sampeyan pan ngorbana apa nggo bukti cinta ning Gusti Allah?...apa cukup korban wedus,sapi atawa onta..?

Pengorbanan sing tulus,kwe inti kisahe nabi ibrahim,angger dewek wis bisa tulus ning hal apa bae,ngko bakal ana pitulung sing Gusti Allah,sebab saking melase Gusti Allah.

jare Sya'ire Rabiah Al addawiyah

"Ya Allah, jika aku menyembah-Mu

Karena takut neraka, bakarlah aku di dalamnya

Dan jika aku menyembah-Mu

Karena mengharap surga, campakkanlah aku darinya

Tetapi, jika aku menyembah-Mu

Demi Engkau semata,

Janganlah Engkau enggan memperlihatkan keindahan wajah-Mu

Yang abadi padaku"

ya wis sedulur samene bae,ora usah dawa-dawa mbokan bosen,dudu nyong ngguruni,apa maning sok kyai,tapi apa salahe sih nafakuri Bada Aji,mbokmenawa olih berkah sing Ilahi Robi.

Selamat Idul Adha,njaluk ngampura mbokan inyong nduwe salah,njaluk salahe inyong disembeleh kabeh,kaya wedus sing dikorbanna.

Sumenep-03-11-2011

Mbah Kyai Sulaiman ( Kali Pemali- Buaran )

Mbah Kyai Sulaiman ( Mbah Leman ) kwe salah siji kyai sing unik lan nylenEh sing ana ning brebes selatan,Kyai sing ora nduwe santri,ora nduwe pesantren,kyai-Kyai sing pada nduwe pesantren kabeh ngormati ning Mbah Leman,umahe Mbah Leman ning pinggir kali Pemali Buaran,umahe sederhana,perabot ning njerone mung meja kuna karo rusbang,mbah Leman ari lelunga nganggone Sorban Jubah putih karo nyekeli teken atawa tongkat,yen mlaku ora keri Sholawatan,deweke banget ding kencengE nganggo Syariat,ibadah wajib lan sunah dilakokna kabeh,serba pan apa mesti diawali ndonga.

Nyong ana setitik kenangan karo Mbah Leman,Jaman aku esih cilik Mbah Leman sering maring tokone wong tuaku,gemiyen tokone wong tuaku ning kidul mesjid,studio foto cilik tapi lumayan rame,karena seringe Mbah Leman ning tokoku akhire nyong kenal apik karo Mbah Leman.

Geliseng cerita,aku wis SMP kelas loro,jaman semono lagi baleg-balege,kepengine kabeh bocah wadon sing ayu-ayu ning bumiayu dipacari,"yen kepengin duwe pacar akeh ya kudune duwe ilmu pElEt rah Hep ",om Tarmo ngomong karo nyong," Ilmu pElEt om???...,rika duwe apa om?"..." dih nyong tah ora nduwe hep,nggolet bae ning buku loakan "..."tukune ning endi om?"..."ning pasar wage hep,tapi yen kepengin mantep tah ya kudune kon nggolet guru ilmu kebathinan"...." lah sih nyong pan geguru maring sapa om?"..."Gyeh Hep,..Mbah Kyai Sulaiman sing sering mene kan kenal ikih karo kon,nyong krungu sing wong-wong Mbah leman kwe karomahe duwur,mbokan bae Mbah Leman gelem maraih maring kon"..."iya yah om,Mbah Leman kan eman ikih ning nyong,ya wis lah nyong pan nggone mbah Leman saiki".."Lah kon weruh umahe belih hep?"..."ya gampang takon,ning buaran pinggir kali pemali mbok umahe"..."iya jare tah,ya wis mana mbokan dinein jimat akeh nyong dinein ya hep".."kalem bae om mesti tak bagi"....akhire nyong metu sing toko maring terminal ngejak kancaku MaMad,ora keri tuku gula teh ning toko serayu nggo dinekna Mbah Leman.

"siji maning mangkat,siji maning mangkat"...kenet angkudes gendoakan,ngetem se uwen-uwen ora mangkat-mangkat,penumpange lagi sepi mergane bocah sekolah lagi pada libur...barang anuk mbok troyog bae ana wong nggo putih-putih mlebu angkudes..."Assalamualaikum warohmatullahi wabarakatuh"...nyong karo penumpang liyane njawab kabeh " Walaikumsalam warohmatullahi wabarakatuh"...jebulane Mbah Kyai Sulaiman sing mlebu,kayong kebeneran temen,pan maring umahe malah ketemu ning njero angkudes,Mbah Leman bar ngucap salam terus nyalami ning kabeh penumpang,barang salaman karo nyong deweke kaget.." dih kon nong nang gagah pan maring endi?"...nyong semaur " nyong pan ning umahe njenengan Mbah"..." lah ya wis kebeneran nang gagah,miki tembe bae mbah sing tokone bapamu,biasane kon katon lagi ngentor ning ngarep toko miki tah langka jebul lagi njubleg ning kene".

Supire nyetater mobil,terus jalan,barang wis anjog pasar wage kenete nariki bayaran,mbah Leman ngomong.." Kye penumpang sing ana ning kene tak bayari kabeh ding aku"...wong ning angkudes kaget kabeh,lah ujug-ujug kancaku si MaMad karena rumangsa ora kepenak dibayari deweke ngomong.." Mbah kulo tah mboten usah dibayari"...mbah leman takon ning MaMad " kon duwe duiiitt?"..."nggih Mbah"..."ya wis angger kaya kuwe kye kabeh penumpang dibayari ding kon"...wkwkwkwk nyong ngekek krungu mbah Leman ngomong kaya kuwe.."Mad ente gari manut karo Mbah Leman koh malah ngEngkEng akhire ente sing dikongkon mbayar,gaiyan ente mbayar kuwalat kon angger ora nuruti omongane Kyai"..."apes kye nyong hep, apes!"...MaMad ngetokna duit rolas ewu nggo mbayari wong rolas,jaman semono maring buaran ongkose mung sewu perak.

"Kiri,kiri,kiri"...nyong karo Mbah Leman mudun sawise jembatan kali pemali buaran,.."nang gagah kyeh mene Mbah digandeng"...nyong langsung nyekeli tangane Mbah leman.."hiiss nggandenge aja kaya kwe,jentikmu karo jentikku gandengan"..nyong manut bae lah wedi kuwalat,sadawane dalan awit sing jembatan anjog umahe Mbah Leman nyong karo Mbah leman nggo tontonan uwong,sing pada ndelengna pada kegugu,weruh gandengane nyong karo Mbah Leman kaya wong pacaran,asline nyong isin nemen digeguyu,tapi nyong ndeleng mbah leman cuek bae karo sholawatan.

"Assalamualaikum,..mak kye ana tamu sing bumiayu,gagiyan digawekna wedang"...mbah leman ngongkon ning bojone,nyong karo MaMad njagong,ora suwe bojone Mbah Leman metu nggawa wedang karo nggawa madang.." wis gagiyan pada madang ndisit"..Mbah Leman ngongkon ning nyong.

Rampung madang..."ana apa tong gagah,kadingarEn kon koh kepengin dolan mEnE"..."anu mbah nyong kepengin merguru ning njenengan"...mbah Leman gemuyu karo takon maning " Geguru ilmu apa,Mbah tah wong bodo ora nduwe Ilmu,sing duwe ilmu tah mung Gusti Allah tok"..."lah aja ngrendah kaya kuwe Mbah jare omku,Mbah Leman kwe karomahe duwur,pokoke yen nyong ora diajari ilmu nyong ora pan balik,pan ning kene bae"..."temenan kye kon pan belajar Ilmu,tolih kon pan belajar ilmu apa?"..."nyong kepengin bisa ilmu pelet Mbah"..nyong ngomong karo nyrenges nutupi isin..."ha ha ha....kon pengin belajar Ilmu pelet,ya wis kyeh tak ajari tapi aja sembarangan ya,"...mbah leman ngakak krungu nyong njaluk ilmu pelet.

"kyeh cara rituale,dicatet ya"

"Sembahyang hajat patang rokaat karo puasa selama seminggu,tiap bar sembahyang maca Bismillahirohmanirohim ping sewu,bar kwe maca...SUN MATEK AJIKU SEMAR MESEM,MUT MUTANKU INTEN,NURCAHYO MANJING PILINGANKU KIWA TENGEN,SING NYAWANG KEGIWANG,TEKO WELAS TEKO ASIH MARANG AWAK INGSUN,...wis kweh mana dilakoni"..."maturnuwun nemen ya mbah,ya wis ya mbah aku langsung balik lah,wis sore soale mbokan langka mobil maring bumiayune,tulung aja ngomong bapane nyong ya mbah yen aku mene njaluk ilmu pelet"..."iya iya mbah ora bakal wadul".

Nyong balik,bengine nyong langsung tirakat,nganti seminggu rampung kabeh,barang wis rampungan nyong prengasa gagah dewek yakin nemen bakale akeh bocah wadon pada seneng.mangkat sekolah ning sekolahan rapalane tak waca terus,tapi daning ajeg bae langka bocah wadon nguber-nguber,nyong dadi ragu kyeh,jangan jangan Mbah leman goroh,daning ilmune ora cespleng ora apa,tapi ya mbokan ngesuk tah ya ana sing nguber-nguber,esuke ya pada bae kaya dina wingi langka sing nguber-nguber,ah mbarah nyong pan tak takokna maning ning mbah Leman mbokan bae nyong tirakate ana sing salah.

"assalamualaikum mbah"..."walaikumsalam warohmatullahiwabarokatuh"..mbah leman mbuka lawang terus nyalami nyong...."priben nang gagah wis dilakoni kabeh ilmune?",..."uwis Mbah,tapi daning ora cespleng yah,wacanane ana sing salah nean mbah?"..."he he he,kyeh mene njagong ndisit,kon wis sembahyang hajat?"..." uwis Mbah"..."wis wirid Bismillah?"..."Uwis Mbah"..."rapalane ya wis diwaca?"..."uwis Mbah"..."puasane sih rampung?"..."uwis Mbah"...."gyeh nang gagah,wong wirid kuwe kudu ngarti tulisanne terus kudu ngerti artine,terus kudu ngerti maknane,terus kudu ngerti ngamalnane,terus kudu bisa ngikhlasnane,faham kon!!...sing arane Bismillah kwe intine kasih sayang,angger kon wis bisa kasih sayang maring sapa bae ya ngko kabeh wong bakal seneng maring kon,ora susah kudu di pelet,angger kon wis bisa susah seneng mesem,ngemut inten ora kakehen cangkem ya sing nyawang kegiwang,teka welas teka asih maring kon,!!...kon kan tembe ndremEmEl maca tok durung nglakoni makna sing sebenere Bismillah"...nyong mantuk-mantuk tok karo isin ning mbah Leman..."berarti nyong salah ya mbah?"..."ya mbangkana salahe,kon kwe ora beda karo manuk beo,bisa ngomong apa bae tapi ora ngerti apa sing diomongna"..."Astaghfirullah,"..aku nangis mrebes mili,dudu sebab digranyami ding mbah Leman,tapi sebab ngrasa salah nemen ning pangeran,selama kiye nyong,wirid,sembahyang tapi ora ngerti makna hakikine,ora ngerti pengamalan ning kesehariane..."maturnuwun nemen mbah pelajarane,mbah wis mbuka pemahamane nyong,saiki nyong wis ngerti pelet sing paling ampuh ya perilaku kasih sayang,aku njaluk ngampura sing akeh".

akhire nyong balik karo mikiri apa sing diwejangna ding mbah Leman.

Kwe setitik kenangane nyong karo Mbah Kyai Sulaiman Kali Pemali Buaran,selamat jalan Mbah sampekna salamku nggo Gusti Allah.

( Sumenep - 09 - 10 - 2011 )